До крајот на овој месец се очекува да биде исплатена првата транша од унгарскиот заем за поддршка на компаниите. Во дел од банките проекти веќе има одобрено и поднесено е барање за исплата до Развојната банка. Ова беше споделено на денешната средба на министерката за финансии Гордана Димитриеска-Кочоска со претставниците на Стопанската комора на Македонија.
Како што соопштија од Министерството за финансии, Димитриеска-Кочоска почнува со серија разговори со бизнис заедницата, чија цел ќе биде да се споделат информации за пласманот на средствата од унгарскиот заем.
-Почнуваме серија разговори со бизнис заедницата и почнуваме денеска од Стопанската комора на Македонија. Целта е преку овие состаноци да споделиме информации за пласманот на средствата од унгарскиот заем наменет за компаниите и да решиме евентуално дилеми кои се јавуваат во тој процес, рече министерката на средбата.
Таа додаде дека целта е средствата да бидат пласирани во цел износ, да се помогне стопанството во моментов, имајќи ги предвид случувањата на глобално ниво и да се поттикнат инвестиции, пред се одржливи кои носат развој.
За претседателот на Комората, Бранко Азески, најважно е овие средства, обезбедени од Владата, да стигнат што е можно побрзо до компаниите и да почнат да се реализираат инвестициите.
Тој ја поздрави иницијативата за вакви состаноци на кои може да се разменат мислења за актуелни теми, но да се отворат и прашања кои ги засегаат компаниите.
Од Министерството потенцираат дека на средбата се отвори прашањето за повратот на средствата уплатени од компаниите по основ на Законот на солидарен данок.
Министерката за финансии истакна дека тоа претставува голем товар врз буџетот, но посочи дека средствата ќе бидат вратени кон компаниите во рок пократок од пет години и дека претстојат средби со компаниите на чиј предлог ќе се утврди динамиката на враќање. Со разговорите ќе се продолжи, во наредниот период ќе бидат подготвени предлози врз основа на кои ќе се разговара и ќе се решава ова прашање. Од Стопанската комора изразија разбирање за состојбата на државната каса и се подготвени на разговори и утврдување на динамиката и начинот на враќање на средствата.
-Присутните заклучија дека дијалогот е можност за решавање на сите отворени прашања и дека таквиот дијалот меѓу Владата и бизнис заедницата ќе продолжи и во иднина со цел создавање подобри економски услови и економска предвидливост за работење. Дијалогот со бизнис заедницата ќе продолжи во наредните денови и со средби со другите стопански комори и здруженија, се вели во соопштението на Министерството за финансии
