Три години предметот за смртта на родилката Маја Кадиева од Дојран и нејзиното штотуку родено бебе чекал ред за да дојде на разгледување во Апелација Скопје пред судијата Ѓоко Ристов, објави порталот „Сакам да кажам“ (СДК).
Обвинети беа гинеколозите Венци Чалков и Дончо Москов од Струмица за кривичното дело Тешки дела против здравјето на луѓето.
Кадиева почина на 22 октомври 2015 година во Општата болница во Гевгелија. Обвинет беше и анестезиологот Томе Ванчев од Гевгелија, кој во периодот на десетгодишното судење почина. Во текот на истрагата почина и вториот анестезиолог Зоран Јовановски.
„Три години делото да биде во нечија фиока, да чека да се работи е далеку од здрав разум. Пресудата е донесена од Основен суд Велес на 19 март 2020 година, предметот во Апелација Скопје се работи на 23 мај 2023 година. Судот нема рок кога да го стави на разгледување, но има разумен рок за работа на предметот. А дали ова е разумно? Позитивно е што деновиве имало некој совесен судија во Врховен суд, па пред рокот на истекот на застарувањето на ова дело, 22 октомври, ја ставил на разгледување жалбата од обвинетите иако имало барање да се одложи, а со тоа и делото ќе застареше“, рекол сопругот на починатата Маја, Димитриј Кадиев, се наведува во објавата на СДК.
На 15 октомври годинава, една недела пред да застари случајот, се додава во текстот, Апелациониот суд ги прогласил за виновни гинеколозите Чалков и Москов и изречена им била затворска казна од шест месеци, која ќе се изврши ако во следните две години сторат ново кривично дело. Предметот сега е пред Врховен суд, по изјавена жалба од бранителите на обвинетите.
Двапати во Основен суд Велес, пишува СДК, судијката Габриела Гајдова донесувала ослободителна пресуда за гинеколозите и осудителна за анестезиологот. Апелација Скопје во два наврата ја потврдувал оваа пресуда. Втората била обжалена до Врховен суд, се додава, кој ја прифатил жалбата на одбраната и ја вратил во Апелација Скопје.
„За смрт на родилка и нејзиното бебе двапати се носеше ослободителна пресуда, сега условна. Која е цената на човечки живот? Политичарите кои беа судени за криминал, колегите ги помилуваа, го изменија Кривичниот закон и делата им застареа. Во оваа земја само политичарите се заштитени, обичниот граѓанин не. Каква порака се испраќа?“, рекол Кадиев.
Според порталот „Сакам да кажам“, во текот на судскиот процес за смртта на Маја Кадиева, сведоците од Гевгелиската болница, кои присуствувале на породувањето во судница, изјавиле дека не се сеќаваат на случувањата во салата, иако во истрагата пред јавен обвинител прецизно ги опишувале дејствијата на докторите. СДК наведува дека, и покрај тоа што сите сведоци биле под заклетва, при сведочењето ги промениле исказите што ги дале пред обвинителот непосредно по смртта на родилката.
