Иран утрово започна четврти бран ракетни напади врз Израел – објавија властите во двете земји.
– Нова серија напади во рамките на Операцијата „Вистинско ветување 3“ – соопшти иранската државна телевизија, осврнувајќи се на одмаздничките напади на Иран врз Израел откако израелските авиони погодија повеќе цели на иранска територија во четвртокот навечер.
Новиот напад го потврдија Израелските одбранбени сили (ИДФ).
– Пред кратко време, сирени се огласија во неколку области на Израел откако детектираа ракети истрелан од Иран кон Израел. Во моментов, израелските воздухопловни сили работат на нивно пресретнување за да се отстрани заканата – соопшти прес-службата на ИДФ, повикувајќи ги граѓаните да ги следат упатствата на војската и да одат во засолништа.
Изралеските медиуми објавуваат дека експлозии може да се слушнат во Тел Авив и Ерусалим.
Израелските медицински служби соопштија дека две лица загинале, а 19 се ранети откако иранска ракета го погодила станбен објект во централен Израел.
Претходно, Ели Бин, директор на „Маген Давид Адом“, израелски еквивалент на Црвениот крст, изјави за локалната телевизија Канал 12 дека една жена е во сериозна состојба, а неколку лица се под урнатини на погоден објект.
Според израелскиот весник „Џерусалем пост“, бројот на жртви од гранатирањето на Исламската Република е еден мртов и 63 ранети. Весникот посочува дека повеќето од иранските ракети биле соборени или не ги достигнале своите цели.
Иран по првпат користел балистички ракети од подморници во нападот врз Израел
Иранските вооружени сили по првпат употребија балистички ракети лансирани од подморници при вечерашниот напад врз Израел – соопшти иранската државна агенција ИРНА.
Станува збор за прва борбена употреба на ваков вид оружје од страна на Иран, наведува ИРНА, повикувајќи се на воени извори.
Револуционерната гарда потврди дека иранските сили извршиле ракетни напади врз десетици цели во Израел, како одговор на израелскиот напад претходно денеска, кој е оквалификуван како најголем досега насочена против Иран.
Вечерашниот напад следуваше по израелските удари во кои беа убиени високи ирански воени команданти и беа погодени делови од иранската нуклеарна програма. Според иранскиот амбасадор во Обединетите нации Амир Саид Иравани нападите биле насочени не само кон нуклеарни капацитети, туку и кон цивилна инфраструктура и станбени згради, при што загинале 78 лица, а над 320 се повредени, од кои огромното мнозинство се цивили.
