Евроамбасадорот Михалис Рокас упати силна порака за поддршка на македонските власти во борбата против организираниот криминал и корупцијата. На конститутивната седница на Националниот совет, тој истакна дека најефективниот начин да се победи криминалот не е само затворот, туку одземањето на финансиските средства.
„Конфискацијата на незаконски стекнатите средства е тоа што најмногу ги обесхрабрува криминалните активности. Кога ќе ја одземете користа, ја расчленувате целата криминална организација“, изјави Рокас.
Тој нагласи дека ЕУ постојано го модернизира своето законодавство за да одговори на брзите криминални трендови и ја посочи Европската директива за поврат на имот како клучен патоказ. Рокас му оддаде признание на вицепремиерот за формирањето на овој Совет, кој според него е јасен доказ за заложбата на државата во справувањето со тешките форми на криминал и перењето пари.
