Инспектори од Дирекцијата за санитарни, ветеринарни и безбедносни прашања за храна во романскиот град Бузеу изземаа 1,2 тона месо од продажба, за кое постои сомнеж дека е заразено со вирусот на африканска свинска чума, јави телевизијата Диџи24.
Во текот на јуни биле извршени над 300 инспекции кај економски оператори долж целиот синџир – од производството до продажбата. Контролите биле насочени кон почитување на општите хигиенски услови, барањата за следливост и правилно етикетирање на прехранбените производи.
По завршените проверки беа утврдени структурни недостатоци, отсуство на здравствени проверки, немање мониторинг на температурата во ладилниците, проблеми со етикетирањето, складирањето и ракувањето со храната. Како резултат на овие неправилности беа изречени шест парични казни во вкупна вредност од 33.600 леи (близу 13.000 лева) и издадени 23 предупредувања, соопшти Дирекцијата.
Дополнително, биле земени над 380 примероци од храна за да се утврди нивната усогласеност со законските регулативи.
Само пред една недела, вирусот на африканската свинска чума беше потврден на две фарми во областа Бокша, во југозападна Романија. Локалниот центар за контрола на болести спроведе строги мерки за контрола и превенција, меѓу кои и воспоставување на зона за набљудување со радиус од десет километри, што ги опфаќа и блиските ловишта.
Африканската свинска чума е вирусно заболување што не се пренесува на луѓето и не претставува ризик по јавното здравје, но предизвикува значителни економски загуби во сточарството, нагласуваат романските медиуми.
