Опозициската партија СДСМ преку официјално соопштение упати сериозни обвинувања до лидерот на Движењето ЗНАМ, Максим Димитриевски, тврдејќи дека зад неговата политичка реторика се кријат тајни бизнис интереси. Во партиската реакција се наведува дека додека Димитриевски јавно се позиционира како патриот и борец против корупцијата, тој се јавува како сопственик на компанија регистрирана во соседна Република Бугарија.
Од СДСМ изнесоа конкретни податоци за наводната сопственичка структура и локација на фирмата во Бургас.
„Еве Максо, има фирма во Бугарија. Види Максо, ти си сопственик! А изгледа дека не е само една. Додека Максим Димитриевски се претставува како „антикорупционер“ и „голем Македонец“, фактите покажуваат сосема спротивно. Фирмата МБС ГЛОБАЛ била регистрирана на 07.08.2015 година на адреса булевар „Стефан Караџа“ во Бургас, Бугарија. Компанијата се занимава со трговија на големо со непрехранбени производи. Дополнително, сопругите на Димитриевски и Серафимовски имаат друга компанија во Македонија – АЈФИКС ДОО од Доброшане, Куманово.“
Во соопштението се упатуваат низа прашања за финансиското работење на кумановскиот градоначалник и се обвинува дека неговата коалиција со владејачката ВМРО-ДПМНЕ служи за правење на дефокус од европската агенда на земјата.
„Максо, колку фирми имаш во Бугарија и колку во Македонија? Колку тендери си наместил? Колку пари си префрлил преку кумови и блиски? Види Максо, доаѓа времето на вистината. Нема повеќе лаги. Максо, доаѓа времето на правдата и одговорноста… Немаш право ти, кој си со „промакедонската“ партија на бугарски државјани, со организираната криминална група ВМРО и со Христијан Мицкоски кој те плаќа преку тендери, да правиш дефокус од Европската реформска агенда… Сите – и ти, и Филков, и Сашо Петровски, и целата криминална група предводена од шефот на бандата Христијан Мицкоски – ќе одговарате! Реформи сега. Правда сега. Европа сега.“
