Еден од најомилените спортски парови во светот, Ана Ивановиќ и Бастијан Швајнштајгер, одлучија да го прекинат својот брак по девет години заедно.
Веста ја потврди адвокатот на познатата српска тенисерка, со напомена дека нема да има понатамошни изјави, бидејќи, како што е наведено, „во целиот процес, најважно за Ана е да се грижи за децата“.
Ана и Бастијан се венчаа во јули 2016 година на романтична церемонија во Венеција, која беше внимателно следена од светските медиуми.
Двојката се запознала две години претходно, додека Швајнштајгер сè уште играл за Баерн Минхен, а Ана полека ја завршувала својата извонредна тениска кариера, која официјално ја завршила во декември 2016 година, истата година кога се венчале.
Тие имааат три деца – два сина, Лука и Леон, додека идентитетот на најмладото дете никогаш не бил јавно откриен.
Иако изгледаа хармонично во јавноста, во последните месеци се повеќе се шпекулира за криза во бракот.
Како причина за разводот, правниот застапник на Ана, Кристијан Шерц, наведе „непомирливи разлики“, апелирајќи до јавноста да ја почитува приватноста на семејството, особено на децата.
Германскиот БИЛД пишува дека проблемот настанал поради различни животни приоритети – Ана поминувала повеќе време во Србија, каде што нејзиното семејство ѝ помага со децата, додека Бастијан често бил на патувања поради неговите обврски како фудбалски коментатор.
Парот последен пат се појавил јавно заедно во септември минатата година, на Лејвер купот во Берлин, а потоа и на божиќниот пазар, по што објавите на семејството на социјалните мрежи речиси целосно згаснаа.
Ситуацијата дополнително ја разгоре веста објавена од германските таблоиди во јуни – Швајнштајгер беше виден како се бакнува со својата нова партнерка, идентификувана само како „Силва“, Бугарка што наводно ја запознал преку децата. Парот е виден заедно на плажа, а исто така бил на патувања во Мароко и Мајорка.
Додека Бастијан одмараше во странство, Ана неодамна престојуваше во Лондон по повод Вимблдон, турнир кој е еден од нејзините омилени, а каде што стигна до полуфиналето во 2007 година.
