Деканот на Градежен факултет и кандидат за градоначалник на Скопје на граѓанската платформа „Независни заедно“, Горан Марковски, во интервју за порталот „Локално“ вели дека Скопје е град со хронични слабости, односно „Монти Пајтон“ метропола.
Поради тоа оценува дека скопјани веќе немаат време за губење и чекање и не смеат да ја прокоцкаат понудената независност.
Деканот наведува дека градењето во главниот град треба да се регулира, не да се сопре. Според него, мораториумот е популистичка мерка која кога-тогаш пропаѓа.
– И да не биде дека само критикувам, сега само ќе споменам дека во програмата која ќе следи ќе бидат наведени неколку мерки со кои многу брзо ќе се воведе ред во оваа моментално де-регулирана дејност, вели тој во интервјуто.
Марковски за Скопје вели дека е град со хронични слабости.
– Главен град на држава во XXI век со проблеми од XIX век. Со недостиг на вода за пиење, расфрлано ѓубре, дивоградби, прашина на сите страни, диви и запалени депонии, непрочистени отпадни води, макадам улици, без јавен превоз, со кучиња скитници, непрегледани мостови и како врв на сѐ – со истепана градоначалничка. Монти Пајтон метропола. Европска престолнина на трагикомедијата.
