Арбен Таравари, лидерот на крилото на Алијанса за Албанците, постојано ја менува приказната како што му одговара, па двапати влезе и излезе од владината коалиција, како млада невеста што постојано ја прекинува свадбата, реагираат денеска од владејачката ВМРО-ДПМНЕ откако претходно од неговата партија обвинија дека злото на ВЛЕН доаѓа од нивните владини партнери, како ВМРО-ДПМНЕ, ЗНАМ и Српската демократска партија на Иван Стоилковиќ, а не од албанската опозиција.
„Денеска ВМРО-ДПМНЕ му е злото, а пред само два месеци со истото тоа ВМРО-ДПМНЕ гордо седеше во Владата“,се вели во писмената реакција од владејачката партија.
Оттаму прашуваат со што е уценет Таравари и уште колку пати ќе ја продава истата приказна.
Според партијата, вистинското зло не е ВМРО-ДПМНЕ, туку неговото лицемерие и двојниот стандард, зашто секогаш кога не добива функција, веднаш го прогласува партнерот за виновен.
„Таравари или не знае што зборува или знае, ама намернио ја менува плочата за да си го оправда влезот и излезот од коалицијата“,пишува во партиската реакција.
Од ВМРО-ДПМНЕ посочија и неколку факти за политичкото дејствување на Таравари од февруари 2024 година, па досега.
Така, велат дека во февруари 2024 година Таравари самиот изјави оти ВМРО-ДПМНЕ и СДСМ го гледале неговиот блок како посакуван партнер. Призна дури и оти од Али Ахмети добивал неодоливи понуди за прв албански премиер и претседателски кандидат.
Во јуни 2024 година, Владата е изгласана со партнерство на ВМРО-ДПМНЕ и коалицијата на опозициските партии на Албанците – ВЛЕН, а во мај следната година, Алијанса за Албанците на Таравари ја нашушти коалицијата ВЛЕН со образложение за наводни неисполнети ветувања. Сепак, дел од неговата партија остана во Владата.
Од ова, според владејачката партија, може да се заклучи дека проблемот не е идеологијата, туку можеби во уцена.
Од Алијанса за Албанците (АА) на Арбен Таравари денеска посочија дека злото на ВЛЕН не е албанската опозиција, туку нивните владини партнери, како ВМРО-ДПМНЕ, ЗНАМ и Српската демократска партија на Иван Стоилковиќ.
Велат дека дискриминацијата и деградацијата на Албанците се случува пред очите на функционерите на партиите на Албанците во власта, а тие на тоа не реагираат, ниту, пак, преземаат одговорност.
