Јужноафриканскиот претприемач Ерол Маск, татко на милијардерот Илон Маск, ја посети Босна и Херцеговина за да го процени нејзиниот потенцијал како локација за иден истражувачки институт.
Според Reuters, институтот ќе истражува гравитација, простор-време и долговечност. Посетата доаѓа неколку месеци откако Маск првично ги објави плановите за основање таков центар во Дубаи.
Постариот Маск, 79-годишен инженер кој, според медиумските извештаи, не е во најдобри односи со својот син, за босанскиот портал Klix изјави дека првично му била понудена локација во Обединетите Арапски Емирати. Сепак, пријател по потекло од регионот го советувал да го разгледа Балканот како алтернатива.
„Морам да признаам дека бев пријатно изненаден од она што го најдов тука. Економијата, достапноста на сè, однесувањето на луѓето… Поминав неколку дена тука и си помислив – ова е идилично. Мојата почетна идеја беше дека Емиратите се идеални, но сега кога го видов ова… би рекол дека ова е многу подобро“, изјавил Ерол Маск.
Стопанската комора на Федерацијата на Босна и Херцеговина потврди дека му го претставиле на Ерол Маск потенцијалот на земјата, со акцент на образованата работна сила и економските можности.
Ерол Маск појасни дека сè уште не разговарал за својата идеја со претставници на властите на БиХ, нагласувајќи дека станува збор за приватна иницијатива. Тој нагласи дека сака да избегне прекумерна владина контрола и да привлече луѓе кои „не се со испрани мозоци и кои не мислат дека таквите работи се невозможни“. Како дел од неговата европска турнеја, тој ги посети и Австрија и Србија.
Ерол Маск призна дека не го истражил темелно сложениот политички систем на Босна и Херцеговина, ниту пак разговарал за потенцијалната инвестиција со својот син. Сепак, на крајот нагласи дека ќе се обиде да го убеди во потенцијалот што го нуди регионот.
(Klix.ba)
