Технолошкиот гигант Мета се подготвува да изгради напредни уреди за потребите на американската војска, во рамки на заеднички проект со одбранбената компанија Anduril Industries, основана од Палмер Лаки – пионер во развојот на технологија за виртуелна реалност и познат поддржувач на американскиот претседател Доналд Трамп. Проектот, според „Wall Street Journal“, е наречен EagleEye, а вредноста на договорот се проценува на околу 100 милиони долари, иако тој сè уште не е официјално доделен.
Оваа соработка е дел од многу поголем договор на американската армија вреден 22 милијарди долари, чија цел е развој на напредни носливи системи. Главен носител на проектот е токму Anduril, а Мета, со своето искуство во проширена и виртуелна реалност, ќе обезбеди технолошка поддршка.
Според достапните информации, EagleEye ќе вклучува паметни шлемови, очила и други уреди опремени со AR/VR технологии и напредни сензори за подобрување на видот и слухот на војниците. Извршниот директор на Мета, Марк Закерберг, изјави дека оваа технологија ќе придонесе за „заштита на интересите и дома и во странство“.
Во пракса, овие уреди би можеле да се користат за рано откривање на беспилотни летала на километарски растојанија, идентификација на скриени цели, како и за интеракција со автономни оружени системи кои користат вештачка интелигенција. Основата на овие уреди ќе биде AI софтверот на Мета и автономната технологија на Андурил.
Иако проектот веќе предизвикува реакции поради својата потенцијална дистописка примена, Лаки во изјава за медиумите вели дека верува оти соработката со армијата е нужност. „Успеав да ги убедам не само Мета, туку и многу други компании дека соработката со војската е важна“, рече тој.
Палмер Лаки последниве години се етаблира како значаен играч во одбранбениот сектор, обезбедувајќи договори вредни 6 милијарди долари ширум светот. Во неодамнешно интервју за CBS News, изјави:
„Секогаш сум велел – треба да престанеме да бидеме светска полиција и да станеме светска продавница за оружје“.
