Претседателот на САД, Доналд Трамп, на митинг во Пенсилванија објави дека планира да ги зголеми царините за увоз на челик од 25 на 50 проценти, а подоцна на социјалните мрежи изјави дека зголемувањето ќе важи и за алуминиумот и дека ќе стапи на сила во среда.
Трамп рече дека двојното зголемување на царините за челик „дополнително ќе ја обезбеди челичната индустрија во Соединетите Американски Држави“.
„Ќе воведам зголемување од 25 проценти. Ќе ги зголемиме царините за увоз на челик од 25 на 50 проценти, што дополнително ќе ја обезбеди челичната индустрија во САД“, рече Доналд Трамп, пренесува Ројтерс.
Тарифите би се однесувале на милиони тони увоз на челик и алуминиум од Канада, Бразил, Мексико, Јужна Кореја и други земји што влегуваат во САД без царина.
САД се најголемиот увозник на челик во светот , освен Европската Унија, со вкупно 26,2 милиони тони увезен челик во 2024 година, според податоците од Министерството за трговија.
Новите тарифи веројатно ќе ги зголемат цените на челикот низ целиот спектар, погодувајќи ја и индустријата и потрошувачите.
Во февруари, Трамп ги зголеми царините за челик и алуминиум на 25 проценти „без исклучоци“.
Двојното зголемување на царините за челик и алуминиум ја интензивира глобалната трговска војна на Трамп и доаѓа само неколку часа откако тој обвини дека Кина го прекршува договорот со САД за меѓусебно укинување на царините и трговските ограничувања за критичните минерали.
Тие исто така доаѓаат еден ден откако Апелациониот суд на САД пресуди дека тарифите на Трамп, блокирани од Судот за меѓународна трговија, можат да останат на сила до жалбеното рочиште за таа одлука.
Американскиот суд за меѓународна трговија претходно ги блокираше царините откако утврди дека Трамп ги пречекорил своите претседателски овластувања со воведување царини на глобално ниво, повикувајќи се на закон што дозволува итни мерки за надворешна политика.
