Американскиот претседател Доналд Трамп најави дека следната недела во САД ќе поднесе тужба против Би-би-си, барајќи отштета од една до пет милијарди долари. Причината, како што тврди тој, е „монтажа“ на неговиот говор од 6 јануари 2021 година – денот кога негови поддржувачи влегоа во Капитол.
„Ќе ги тужиме најверојатно следната недела за отштета од една до пет милијарди долари. Мислам дека треба, во смисла дека дури и признаа дека тоа е измама. Ги извртеа моите зборови“, изјави Трамп.
Тој додаде дека планира да разговара со британскиот премиер Кир Стармер за време на викендот, посочувајќи дека според него Стармер се обидел да го контактира и дека е „многу засрамен“ од инцидентот.
Адвокатите на Трамп претходно и дадоа рок на Би-би-си – до вчера да го повлече документарецот или да се соочи со тужба од „не помалку од“ една милијарда долари. Освен тоа, тие побараа британскиот јавен сервис да се извини и да надомести за „значително нарушување на репутацијата и претрпената финансиска штета“.
Би-би-си призна дека монтажата на говорот на Трамп била „погрешна процена“ и пред два дена му испрати лично извинување. Сепак, од медиумот тврдат дека Трамп нема правна основа за тужба.
Спорниот документарец содржи три изменети извадоци од неговиот говор, што според адвокатскиот тим на Трамп го прави филмот „манипулативен и клеветнички“.
