Три лица загинаа, а 35 се повредени откако автобус што превезувал работници се превртел на патот помеѓу Сремска Митровица и селото Јарак во западна Србија, соопштија властите, цитирани од РТС.
Инцидентот се случил вчера околу 14:45 часот по локално време, кога автобус управуван од „Сирмиум бус“ , кој превезувал вработени во „Хелткер“ , од непознати причини излетал од патот и се превртел на покрив .
Две лица починале на самото место , а третото починало подоцна во болницата во Сремска Митровица. Сите повредени биле однесени во локалната општа болница , каде што им била укажана лекарска помош.
Дежурниот лекар во болницата, д-р Воислав Мирниќ , за државната телевизија РТС изјави дека шест медицински екипи веднаш реагирале и им пружиле помош на жртвите.
„Меѓу повредените има и тешко и лесно повредени, но повеќето имаат потешки повреди. Еден пациент е пренесен во Клиничкиот центар на Војводина“, прецизираше тој.
На местото на настанот пристигнале полиција, екипи за итни случаи и дежурен обвинител од Главното обвинителство во Сремска Митровица .
Според соопштението од српското Министерство за внатрешни работи , причините за несреќата сè уште се разјаснуваат. Возачот на автобусот е уапсен и приведен до 48 часа, додека трае истрагата.
