ФИФА планира во иднина да оствари приход од една милијарда долари од светските првенства за жени, почнувајќи од и во проширен формат со 48 репрезентации, најави денеска претседателот на ФИФА, Џани Инфантино.
„Гледаме значаен, експоненцијален раст во женскиот фудбал“, рече Инфантино на Саудиско-американскиот инвестициски форум во Ријад.
Како и Светското првенство за мажи, кое ќе се зголеми од 32 на 48 екипи и од 64 на 104 натпревари од 2026 година, така и Светското првенство за жени се прошири од 24 на 32 репрезентации во 2023 година, а бројот на селекции ќе се зголеми на 48 почнувајќи од 2031 година.
„Нашата цел е да генерираме една милијарда долари приходи од Светското првенство за жени, или околу 890 милиони евра, за да може овие средства да се реинвестираат во женскиот фудбал“, додаде Инфантино.
Претседателот на ФИФА не постави рок за постигнување на таа цел, иако следните три домаќини се веќе познати: Бразил ќе биде домаќин на Светското првенство во 2027 година, а засега САД и Велика Британија се единствени во трката за домаќини на Мундијалите во 2031 и 2035 година.
Според податоците на ФИФА, од последното Светско првенство кое во 2023 година се одржа во Австралија и Нов Зеланд бил остварен приход од над 570 милиони долари. За споредба, продажбата на правата за Светското првенство во машка конкуренција во 2022 година донесе заработка од 6,3 милијарди долари.
