Девет лица загинаа, а седум се повредени утрово во руски напад со дрон врз цивилен минибус во градот Билопилја, во североисточниот украински регион Суми, соопштија локалните власти.
Гувернерот Олег Хригооров го нарече нападот „нехуман“, а претседателот Володимир Зеленски изјави дека станува збор за „намерно убиство на цивили“.
Русија не се огласи директно, но државните медиуми јавија дека бил погоден „воен објект“ во Суми.
Инцидентот се случува само неколку часа по првите директни мировни разговори меѓу Украина и Русија од 2022 година, кои не донесоа пробив, освен договор за размена на 1.000 заробеници од двете страни.
Украина повторно повика на целосен и безусловен прекин на огнот, додека како следен чекор се најавува можна средба меѓу Зеленски и Путин.
САД пак, сметаат дека напредок е можен само доколку дојде до директна средба меѓу претседателите Трамп и Путин.
