Сопругата на скопскиот градоначалник Орце Ѓорѓиевски на вчерашниот настан во Македонската филхармонија по повод 100 дена од неговиот мандат се појави со брендирана чанта марка „Хермес“, соопштија денеска од Социјалдеморатски сојуз (СДСМ), посочувајќи дека станува збор за една од најексклузивните и најскапи бренд чанти во светот.
„Ваквите чанти марка ‘Хермес‘ мини Кели 2, од 20 сантиметри чинат од 28 до 33 илјади долари“,се вели во партиското соопштение.
Според СДСМ, додека работниците едвај врзуваат крај со крај и протестираат за повисоки плати, Скопје се дави во ѓубре, граѓаните со часови чекаат автобуси, членовите на ВМРО-ДПМНЕ се луксузираат.
„Очигледно за ВМРО-ОКГ нов и поголем авион не оди со стари или евтини чанти. Луксузирање со авиони на грбот на народот оди со часовници од 60 илјади евра и чанти од 30 илјади евра“,пишува опозицијата.
Оттаму прашуваат што мислат скопјани за овој луксузно-моден патриотизам и за оваа аздисаност.
„Само нека не се вадат дека тоа е фејк или поклон. Може да биде поклон само од Орце. После толку криминални тендери со ‘Пирамид билдинг‘ и ‘Ленди груп‘, нивните омилени фирми тоа е секако очекувано“,додаваат од СДСМ.
