Американскиот претседател Доналд Трамп нареди распоредување на 2.000 војници од Националната гарда во Лос Анџелес за смирување на немирите по рациите врз нелегалните имигранти, по вториот ден судири меѓу демонстрантите и федералните власти.
Демонстрантите сепак излегоа на улиците, а војниците на Националната гарда испукаа солзавец кон нив.
Од друга страна, демонстрантите фрлаа разни предмети кон полицијата, дополнително зголемувајќи ги тензиите.
Повторно беше употребен солзавец, додека собраните демонстранти гласно скандираа: „Нема да нè отстраните!“
За време на конфликтот беа регистрирани неколку апсења.
Полициската управа на Лос Анџелес го прогласи протестот пред Затворскиот центар Метрополитен за „незаконско собирање“ и одобри употреба на „помалку смртоносна сила“.
„Сите лица мора да ја напуштат областа или ќе се соочат со апсење“, објави Централната дивизија на LAPD на Полициската управа на Лос Анџелес на Икс.
„Командантот на теренот одобри употреба на помалку смртоносна сила“, се вели во последователното соопштение. „Поединците што фрлаат предмети кон полицајците ќе бидат приведени и уапсени“.
Доналд Трамп претходно се огласи на својата социјална мрежа. Тој напиша дека Лос Анџелес е преплавен од нелегални имигранти и криминалци и дека федералните агенти биле нападнати за време на операциите за депортација. Тој објави дека им наложил на секретарката за внатрешна безбедност Кристи Ноем, секретарот за одбрана Пит Хегсет и главниот обвинител Пам Бонди да соработуваат со други агенции за да преземат сите потребни мерки за ослободување на Лос Анџелес и запирање на немирите на мигрантите.
„Некогаш голем американски град, Лос Анџелес, сега е окупиран и под опсада од нелегални имигранти и криминалци. Сега насилни, бунтовнички толпи напаѓаат на нашите федерални агенти за да ги запрат операциите за депортација – но овие нелегални немири само ја зајакнуваат нашата решеност.
Им наложив на секретарката за внатрешна безбедност Кристи Ноем, секретарот за одбрана Пит Хегсет и главниот обвинител Пам Бонди, во координација со сите релевантни оддели и агенции, да преземат сите потребни мерки за да го ослободат Лос Анџелес од инвазијата на мигранти и да го запрат овој немир на мигранти.
Редот ќе биде воспоставен, нелегалните имигранти ќе бидат протерани и Лос Анџелес повторно ќе биде слободен. Ви благодарам за вашето внимание“, напиша Трамп.
