Се појавуваат нови детали за злосторството што го потресе Мелбурн. Бремена жена е пронајдена мртва во својот дом, а нејзиниот партнер е обезглавен, објавува news.com.au.
Телото на 39-годишната Атена Георгопулос , по потекло од Грција е откриено вчера вечерта околу 21:55 часот, во стан во Адриен Кресент во Маунт Вејверли. Нејзиниот 50-годишен партнер, Ендру Ган, е пронајден до неа.
Двојката била во врска околу три години и очекувала девојче. Атена била бремена пет месеци.
Тетката на убиената жена, Пати Дилверидис, изјави за Хералд Сан дека нејзината внука никогаш не помислила дека ќе стане мајка.
„Толку многу се радувала на бебето затоа што имала 39 години и никогаш не помислила дека ќе може да се породи“, рече Дилверидис.
Осомничениот е уапсен
Синоќа, 34-годишен маж е уапсен и обвинет за две убиства. Апсењето се случило на железничката станица Вестол во Клејтон Саут во 1:40 часот наутро, а човекот бил придружуван од две големи кучиња.
Детективот Дин Томас од одделот за убиства во Мелбурн потврдил дека уапсениот човек го познавал парот. „Веруваме дека постои врска помеѓу осомничениот и парот“, рече инспекторот Томас.
Морничави графити на куќата
Куќата каде што живеел парот има графити испишани на неа, меѓу кои порака што споменува карма, како и пораки како „месото е убиство“. Видливи се и други фрази, вклучувајќи „предавство, непредвидливо, неизбежно“.
„Полицијата е свесна за графитите на имот во Маунт Вејверли каде што синоќа беа пронајдени телата на две лица“, изјави портпаролот на полицијата. „Детективите за убиства ќе работат на тоа да утврдат дали графитите се релевантни за истрагата за убиството“.
Полицијата првпат била повикана околу 9:20 часот наутро на денот на убиството откако се слушнало викање од домот.
„Потоа имаше втор повик навечер што сугерираше дека ситуацијата може да биде поитна отколку што сугерираше првиот повик, а полицијата пристигна неколку минути подоцна и ги пронајде телата на маж и жена“, објасни инспекторот Томас.
Тој ги повика сите што ќе забележат нешто сомнително во близина на Адриен Корт, Фернтри Гали Роуд и железничката станица Вестол да контактираат со полицијата. Полицијата бара од сведоците или од секој што има информации или снимки да ги контактира.
