Ќе се вработуват анестезиолози, офталмолози, педијатри, ортопеди, психијатри, радиолози. Штипската Клиничка болница, го распиша огласот за вработување на деветнаесет специјализанти. Огласот ќе трае пет работни денови, а заинтересираните кандидати треба дека имат завршено Медицински факултет, положен Стручен испит и Лиценца за работа издадена од Лекарската комора. Со овој оглас, најголемиот здравствен капацитет во источниот дел на државата, полека ќе го решава недостатокот од кадар, проблем со кој се соочуваше последните неколку години.
„Со овие 19 вработуваања, релативно ќе биде задоволен бројот . Сепак, голем дефицит во болницата имаме од средниот персонал. Имаме голем недостаток од медицински сестри, болничари и хигиеничари„ изјави д-р Владко Захариев, директор на Клиничка болница, Штип.
Во наредниот период се очекува да биде распишан интерен оглас за специјализации на веќе вработените лекари по општа медицина. Дополнително ќе се бара и решение за оние вработени кои се на договор на дело.
„Во моментот под договор на дело имаме 42 вработени. Ја чекаме согласноста за продолжување на тие договори кои се за определено време. Во преговори со Фондот за здравство, да се размислува ако може и ако има средства да трансформираме некој од нив во неопределено. Но, тоа е се во преговори„ изјави д-р Владко Захариев, директор на Клиничка болница, Штип.
Штипската Клиничка болница има потреба од околу 130 лекари, медицински и технички кадар. Најголемиот одлив на кадар во изминатиот период беше во приватните болници и во странство.
