Владата до Собранието поднесе измени во Законот за безбедност на сообраќајот, со кои се воведуваат ригорозни казни за пешаците, велосипедистите и возачите на електрични тротинети кои користат електронски уреди додека се движат по коловоз или велосипедска патека.
Според предлог измените, пешаците кои преминуваат улица со слушалки во двете уши, мобилен телефон или друг електронски уред ќе бидат казнети со глоба од 40 евра во денарска противвредност. Велосипедистите и возачите на моторни возила како мопеди, трицикли и четирицикли кои постапуваат на ист начин ќе добијат глоба од 50 евра.
Исти правила важат и за возачите на електрични тротинети, додека специјализирани комуникациски уреди вградени во заштитни шлемови се исклучок.
Измените се дел од пошироките мерки за „Безбеден град“, кои прво ќе се применат во Скопје, Тетово и Куманово, а до средината на 2026 година се очекува да профункционираат низ целата држава.
