Управата на националниот парк „Маврово“ информира дека на 60 локации низ територијата на паркот се поставени камери за надзор.
Новиот систем треба да обезбеди повисоко ниво на заштита на природата, како и зголемена безбедност на дивиот свет и посетителите.
Поставувањето на опремата, како што наведуваат од НП „Маврово“ е во согласност со законски надлежности и обврски и се однесуваат на заштита, унапредување и одржливо управување со природните вредности, биолошката разновидност и екосистемите.
– На ваков начин ќе се следат дивите видови животни и нивната бројна состојба. Освен тоа ќе се овозможи превенција и рано откривање на незаконски активности, како што се бесправна сеча, лов, загадување, уништување на природните ресурси и други дејствија што можат да предизвикаат штета врз животната средина, стои во соопштението од НП „Маврово“
Од управата на најголемиот национален парк во Македонија упатуваат апел до посетителите да се придржуваат кон правилата за движење и престој во рамки на паркот, да ја почитуваат природата и да постапуваат одговорно во зачувувањето на природното богатство.
