Бројот на странски туристи во Шпанија во април се зголеми за речиси 10,1 процент во споредба со истиот период од претходната година, на 8,56 милиони, што претставува најуспешен април за туризмот во историјата на оваа земја од почетокот на мерењата, објави денес Шпанскиот национален институт за статистика (INE).
Повеќе од 1,6 милиони туристи од Велика Британија ја посетија Шпанија во април, што е за 11,1 процент повеќе во однос на истиот месец минатата година.
Бројот на туристички посети од Германија скокна за 13,7 проценти во споредба со истиот период од претходната година, на 1,3 милиони, а од Франција за 10,5 проценти, на 1,3 милиони.
Во април, странските туристи најмногу ги посетија Каталонија, Андалузија и Балеарските Острови, а повеќето од нив поминаа помеѓу четири и седум ноќевања во Шпанија.
Во првите четири месеци од 2025 година, бројот на туристи што ја посетија Шпанија се зголеми за 7,1 процент, на речиси 25,6 милиони.
Вкупната потрошувачка на странски туристи во Шпанија во првите четири месеци се зголеми за 9,3 проценти во споредба со истиот период минатата година – на 34,3 милијарди евра, а рекордите беа срушени во секој од четирите месеци, објавува „Паис“.
Министерството за индустрија и туризам на Шпанија смета дека ова е добредојден сигнал што укажува на отстапување од масовниот туризам.
Доколку оваа стапка на раст продолжи во текот на преостанатите осум месеци од годината, Шпанија до крајот на годината ќе ја посетат повеќе од 100 милиони патници, кои ќе потрошат околу 137,5 милијарди евра во земјата, заклучува шпанскиот весник.
