Познатата македонска пејачка Каролина Гочева тврди дека друштво на македонски иселеници од Дизелдорф повикувало на бојкот на нејзиниот концерт во градот. Гочева, која е на турнеја низ Германија, ѝ се обрати на публиката:
Постојано се испраќале апели да не се присуствува вечерва тука и притоа, тие апели не се ниту од Грци, ниту од Бугари, ниту од оние што ни го газеа знамето, туку од македонско друштво од Дизелдорф.
Повикот за бојкот почнал откако бил најавен концертот, а таа за тоа дознала неколку дена пред истиот.
Македонската заедница во СР Германија реагираше на изјавата на Гочева. Во соопштение до јавноста заедницата објасни дека терминот на нејзиниот концерт се поклопувал со настани организирани од друштвото во истиот град, со што „грубо го кршат договорот за одржување настани и годишниот план за здруженијата и црковните општини од НРВ“.
„Во конкретниот случај, се организира настан на истиот ден и во истиот град Дизелдорф, кога Македонскиот културен клуб „11 Октомври“ организира хуманитране концерт по повод 35-годишен јубилеј на здружениоето со Миле Кузмановски и Татјана Стефановска“, велат од заедницата.
Тие исто така посочуваат дека концертот бил организиран ден пред хуманитарниот концерт на Наум Петрески и Зуица Лазов организиран од Македонскиот културен центар „Македонско сонце“.
Заедницата вели дека и во иднина ќе ги осуди сите настани кои ќе бидат организирани во исти или приближни термини со тие на здруженијата без претходна најава.
