Советот на Народната банка на Македонија ја донесе Програмата за работа за 2025 година, која ќе започне со реализација на новиот годишен циклус активности и проекти, во согласност со новиот Стратегиски план на институцијата. Програмата се фокусира на модернизација и унапредување на функциите на Народната банка, следејќи ги современите трендови и меѓународни стандарди.
Програмата за 2025 година ги опфаќа редовните активности поврзани со монетарната политика, стабилноста на банкарскиот систем, управувањето со девизните резерви, ефикасноста на платниот систем и управувањето со готовината. Народната банка ќе продолжи со спроведување на законските надлежности, додека истовремено ќе воведува промени во работењето за зголемување на ефикасноста, транспарентноста и сигурноста во институцијата.
„Акцентот во 2025 година ќе биде ставен на унапредувањето на рамката за водење на монетарната политика, зајакнувањето на стабилноста на банкарскиот систем и поттикнување на иновациите во платните системи“, изјавија од Народната банка. Институцијата ќе продолжи со поддршка на дигиталната трансформација и автоматизацијата на работните процеси, со цел зголемување на ефикасноста и подобрување на безбедноста на финансиските трансакции.
Во рамките на стратегиските области, особено внимание ќе биде посветено на градењето модерна и агилна централна банка, развојот на нови вештини за поддршка на дигитализацијата, како и зголемување на транспарентноста и соработката со јавноста. Во оваа насока, Програмата за работа вклучува и ревизија на Стратегијата за финансиска едукација и финансиска инклузија, како и активности за зголемување на финансиската писменост на населението.
„Народната банка ќе продолжи со активно вклучување на климатските ризици при оцената на профилот на ризик на банките и ќе преземе активности за градење одржлива и зелена економија“, додаваат од Народната банка.
Во контекст на климатските промени, ќе се работи на стрес-тестирање на отпорноста на банкарскиот систем и ќе се усвои Политиката за одржливост на работењето на институцијата.
Покрај тоа, во програмата е вклучен и развој на стратегија за киберотпорност, со цел зајакнување на сигурноста на информациските системи и одговорноста на Народната банка во време на глобални закани и променливо окружување.
„Со овие активности, Народната банка продолжува да ја гради својата визија да биде независна, одговорна и иновативна институција, која со својот интегритет ја поттикнува довербата кај јавноста“, истакнуваат од Народната банка.
Програмата за работа за 2025 година ќе биде основа за успешна реализација на долгогодишната стратегија и визија на Народната банка, со фокус на стабилноста и модернизацијата на финансискиот сектор во Македонија.
