Во Скопје, пред Зоолошката градина, денес се одржа протест за подигање на свеста за безбедноста на улиците. Граѓаните, со јасна порака за потребата од системски промени, се собраа за да ја изразат својата загриженост за високиот број на сообраќајни несреќи и опасностите со кои се соочуваат. Протестот е организиран од иницијативата „Кој е следен?“, формирана по трагичната смрт на 22-годишната Фросина Кулакова од Неготино, која беше прегазена во Скопје.
Граѓаните нагласија дека полициското присуство и камерите на семафорите се важни, но дека тие не се доволни. За поголема безбедност, потребни се и други мерки, како што се подобрување на јавниот превоз, кој ќе ја намали потребата од приватни возила, подобрување на сообраќајната сигнализација и поостри казни за прекршителите.
Игор Антов, еден од говорниците, истакна дека безбедноста не зависи само од полицијата, туку и од функционален јавен превоз кој ќе помогне да се намалат автомобилите во урбаните средини
.„Безбедноста не се гарантира само со полиција на улиците. Потребен е и функционален јавен превоз кој ќе ја намали потребата од автомобили во градовите“, изјави Антов.
Ива Петровска од организацијата „На точак“ нагласи дека решавањето на овие проблеми не треба да се одложува поради политички интереси, бидејќи секое одложување резултира со изгубени животи.
Како што не се решаваат проблемите, така и се губат животи. Безбедноста треба да биде приоритет, а не нешто што се одлага поради изборни кампањи“, рече Петровска.
Крсто Минговски, претседател на „Еуромобилност“, нагласи дека недостатокот на јавен превоз довел до ситуација каде што во секоја куќа има два или три автомобили, што пак влијае на сообраќајната култура.„
Секој млад човек има автомобил, а без соодветна култура, тоа доведува до несреќи. Потребна е сериозна работа на подигнување на свеста за сообраќајната култура“, рече Минговски.Трагичниот инцидент со Фросина Кулакова се случи на 29 јануари, кога беше прегазена од страна на 20-годишниот Васил Јованов. Јованов е обвинет за кривично дело со умисла, бидејќи на тој ден поминал на црвено светло, без возачка дозвола и под дејство на алкохол, ја прегазил Кулакова на пешачки премин. За него се знае дека претходно бил пријавуван за слични прекршоци. Јованов се соочува со казни од четири до 20 години затвор, во зависност од одлуката на судот.
