Мијалкови преку компанијата “Бест Веј Инвестмент” сакаат да го вратат сопствеништвото врз “Софија градба”- компанија која е најголем акционер во Земјоделскиот комбинат “Пелагонија” и речиси целосен сопственик на фабриката за млечни производи “Здравје Радово”, објави ТВ 24.
Според информациите објавени од Комисијата за заштита на конкуренцијата до каде пак на почетокот на месецов стигнало известување дека “Бест Веј Инвестмент” чиј сопственик е Јордан Мијалков синот на екс директорот на УБК Сашо Мијалков заедно со “Орка Холдинг” сакаат да стекнат заедничка контрола над “Софија Градба” преку купопродажба на удели поделени на 50-50.
Инаку “Орка Холдинг” веќе е сопственик на “Софија Градба”, а вториот актуелен содружник е “Делта 2015 Констракшн”.
„Друштвото за градежништво, трговија и услуги БЕСТ ВЕЈ ИНВЕСТМЕНТ ДООЕЛ Скопје и Друштвото за производство, трговија и услуги ОРКА ХОЛДИНГ АД Скопје поседуваат по 50 отсто од уделите во Друштвото за градежништво, трговија и услуги СОФИЈА ГРАДБА ДОО Скопје со седиште на ул.Орце Николов бр. 71/1 Скопје, а со тоа имаат и заедничка контрола врз ова друштво“, констатира КЗК во известувањето објавено на 17 март.
Од “Орка Холдинг” пак го демантираат известувањето на Комисијата,негираат дека имаат било каков партнерски однос со семејството Мијалкови.
„Уделот на ‚Бест веј’ е продаден на фирма поврзана со семејството на Цветан Панделевски, меѓутоа поради манипулации на акционерите во ‚ЗК Пелагонија’ која има за цел преземање на комбинатот, таа купопродажба на акции не е заведена во Централниот регистар веќе пет години“, објаснуваат од ОРКА Холдинг.
Инаку Мијалкови преку” Бест Веј Инвестмент” и претходно беа сопственици на “Софија Градба” но со отворањето на случајот „Империја“ ја загубија сопственоста.
“Бест Веј Инвестмент” во моментов го поседува Омпетрол Оил, друштво кое во своето портфолио ги има бензинските станици „Бест Веј Оил“, „Мериот Хотел – Скопје“градежната компанија „Девелоп Груп“ која пак го гради хотелот во Охрид на една од најатрактивните локации на охридското крајбрежје за кого граѓанските активисти од Охрид СОС обвинуваат дека дозволите за градба се добиени со непочитување на законите.
Инаку Мијалков беше гонет за повеќе случаи и доби вкупно 24 години затвор за „Империја“, „Таргет-Тврдина“, „Трезор“, „Плацови на Водно“ но од сите нив само за Империја беше на издржување тригодишна казна во струшкиот затвор кој е од отворен тип.
