Во Основниот суд Тетово, продолжи судското рочиште за пожарот во Модуларната болница во Тетово кој се случи на 8 септември 2021 година, каде животот го загубија 14 пациенти и членови на нивните семејства. Пред продолжувањето на повтореното судење, семејствата на жртвите побараа повторно да се отвори истрагата за да се пронајдат вистинските виновници за пожарот, да се формира независен тим кој ќе ги испита сите аспекти на случајот, за да се гарантира дека судската постапка ќе се одвива без партиски или деловни влијанија.
„Време е некој да ја преземе одговорноста за правдата да излезе од фиока. Како членови на семејството на жртвите, ве замолуваме повторно да ја отворите истрагата за сите вистински виновници за пожарот во модуларната болница во Тетово, да формирате независен тим кој ќе ги испита сите аспекти на случајот, вклучително и евентуалното одолговлекување на постапката од страна на обвинителите, да гарантирате дека судската постапка ќе се води без партиско или деловно влијание, за да се обезбеди транспарентност и отчетност во вашата работа во согласност со законските обврски. Германската експертиза нека биде клучен доказ во оваа истрага. Нема да молчиме, ќе продолжиме да зборуваме за нашите најблиски кои ги изгубивме, за правдата која ни е ветена, но никогаш не реализирана“, вели Мумин Исмаили, роднина.
Седницата продолжи со испрашување на стручни лица, електроинженерот Ирфан Шаќири, и Рубин Бошковски, експерт од Министерството за внатрешни работи од секторот за судска медицина. Шаќири зборуваше за инсталацијата на електрична енергија, нагласувајќи дека ја направиле двајца вработени во Клиничката болница Тетово, каде според него, приклучокот на електрична енергија од главната до модуларната трафостаница е направен без никакви стандарди.
Како резултат на поставувањето на повеќе уреди во продолжениот кабел дошол до пожар. Бошковски рече дека според направените анализи објектот на модуларната болница е изграден со лесно запаливи материјали. На сослушувањето беа покренати прашања за недостатокот на противпожарни апарати. На обвинителната клупа се и поранешниот директор на тетовската болница, Флорин Бесими и организацискиот директор Артан Етеми.
