За денеска се планирани околу 1200 протести низ САД и во другите делови на светот, а организаторите очекуваат тоа да биде најголемиот протест во еден ден против претседателот Доналд Трамп и неговиот советник Илон Маск, кои со низа потези ја насочија новата администрација во конзервативна насока, јавија американски медиуми.
Протестот наречен „Hands Off“ ќе им даде можност на противниците на новата влада да го изразат своето незадоволство од прекројувањето на внатрешната и надворешната политика на САД, изјави Езра Левин, еден од основачите на групата Indivisible, еден од организаторите на протестот.
Планирани се протести во сите 50 американски држави, како и во Канада, Велика Британија, Германија, Португалија и Мексико. Еден од најголемите протести се очекува во Вашингтон.
Во протестите се очекува да учествуваат околу 150 активистички здруженија, вклучително и синдикатот SEIU со околу два милиони членови во САД и Канада, Кампањата за човекови права, најголемото активистичко здружение за правата на ЛГБТК, Гринпис и разни други групи.
Синдикатот на СЕИУ е познат по силната поддршка за демократските кандидати, а во 2008 година одвои 28 милиони долари за кампањата на Барак Обама.
Трамп се врати на власт на 20 јануари, а критичарите тврдат дека тој ја преобликувал владата и ја консолидирал претседателската власт со низа мерки сумирани во Проектот 2025, конзервативна политичка иницијатива. Поддржувачите на Трамп ја поздравуваат неговата смелост да ги вознемири длабоко вкоренетите интереси на спротивната, либерална страна.
Лиз Хјустон, од канцеларијата за односи со медиумите во Белата куќа, ги негираше тврдењата на организаторите на протестот дека Трамп планира да ги намали услугите на Медикеид и социјалното осигурување.
„Позицијата на претседателот Трамп е кристално јасна: тој ќе ги заштити социјалното осигурување, Медикеид и Медикер за сите што имаат право на тоа“, рече Хјустон.
Трамп е критикуван и за отпуштање на државни службеници, депортирање илегални имигранти и странски студенти кои учествуваа во насилните пропалестински собири на универзитетите и одземање на правата на трансродовите лица што им ги даде поранешниот претседател Џо Бајден.
Здружението Indivisible е формирано по првата победа на Трамп на претседателските избори во 2016 година и тесно соработува со други идеолошки блиски здруженија како MoveOn и Working Families Party.
