СДСМ веќе го започна процесот за избор на најдобрите кандидати за локалните избори ширум државата, рече претседателот Венко Филипче денеска во одговор на новинарско прашање. Тој додаде дека клучен приоритет на СДСМ е да се промовираат личности со кредибилитет, реална поддршка од заедницата и капацитет за спроведување на програмите.
– Да ги промовираме најдобрите кандидати од сите општини – луѓе од самите средини, кои имаат најголема поддршка и кредибилитет. Луѓе кои можат да ги испорачаат програмите, и вредносно и политички. Еден дел од кандидатите веќе се знаат – тоа се дел од актуелните градоначалници. Имињата ќе ги соопштиме во текот на следната недела. Мислам дека до крајот на јуни веќе целиот процес ќе биде завршен – рече Филипче.
Тој посочи дека во тек се и разговорите за коалициски партнери за локалните избори.
– Ние веќе го започнавме процесот на разговори и пронаоѓање партнери за следниот период, за циклусот на локални избори. Еден дел од преговорите постепено веќе се заокружуваат, други траат, а трети допрва ќе почнат – рече претседателот на СДСМ.
За најавените протести на ДУИ рече дека правото на протест е уставно загарантирано но не треба да се злоупотребува.
– Правото на протест е уставно загарантирана право меѓутоа апсолутно не сметам дека треба да се злоупотребува во политички цели – рече Филипче.
