Двајца полициски службеници биле физички нападнати при вршење контрола на угостителски објект во Виница, каде затекнати биле и малолетници со алкохол, соопштија денеска од Министерството за внатрешни работи.
Од 23:50 часот синоќа до два утрово, постапувајќи по претходно подготвен план, полициски службеници од Секторот за внатрешни работи – Штип во содејство со инспектори од Дирекцијата за заштита и спасување, Државниот пазарен инспекторат, Трудовиот инспекторат, Управата за јавни приходи и Центарот за јавно здравје – Кочани, извршиле контрола во Градскиот базен во Виница.
– Притоа, легитимирани се 19 лица, а извршен е преглед врз осум лица, а од страна на полициските службеници во објектот беа затекнати и три малолетни лица, од кои две на 16-годишна возраст од Виница и едно на 14-годишна возраст од Кочани, како консумираат алкохолни пијалаци. Известен е јавен обвинител од ОЈО – Кочани и по негови насоки, поради постоење на основи на сомнение за сторено кривично дело „точење алкохолни пијалаци на деца“ по член 204 од КЗ на РСМ, од лицата, во присуство на родител – старател, земени се изјави, материјал за анализи и извршено е алкотестирање, појаснија од МВР.
При вршењето на контролата од страна на У.М., 34-годишно лице од Виница, прво вербално, а потоа и физички биле нападнати двајцата полициски службеници. Потоа, У.М. се дал во бегство и се преземаат мерки за негово пронаоѓање.
– Покрај ова и од страна на Државниот инспекторат за труд при контролата, констатирани се прекршоци во делот на нерегулирани работни односи на дел од вработените во угостителскиот објект, истакнаа од МВР.
