На референдумот, кој е закажан да се одржи на 25 октомври, граѓаните на РС ќе гласаат и за одлуката на Централната изборна комисија (ЦИК) на БиХ да му се одземе мандатот на Додик како претседател на тој босански ентитет. Одлуката за референдумот не е во согласност со Уставот на БиХ, кој не предвидува можност субјектите самостојно да распишуваат референдуми за одлуки на државните институции.
Референдумското прашање гласи: „Дали ги прифаќате одлуките на неизбраниот странец Кристијан Шмит и неуставната пресуда на Судот на БиХ против претседателот на РС, како и одлуката на ЦИК за одземање на мандатот на претседателот на РС Милорад Додик?“
50 од присутните 65 пратеници гласаа „за“ одлуката за одржување на референдумот.
Покрај одлуката за референдумот, пратениците на владејачката коалиција усвоија и збир заклучоци со кои Собранието на РС ја „отфрла“ пресудата на Судот на БиХ и одлуката на ЦИК со која му беше прекинат мандатот на Додик.
Во заклучоците се наведува дека Народното собрание се спротивставува на одржувањето предвремени избори, дека „Додик е повикан да продолжи да ја извршува функцијата претседател на РС“ и дека од сите институции во ентитетот се бара да не преземаат активности поврзани со распишувањето избори.
Еден од заклучоците предупредува дека „евентуалната соработка со ККБ на БиХ по ова прашање би претставувала извршување на кривично дело непочитување на одлуките на институциите или органите на РС, како што е пропишано со Кривичниот законик на РС“.
На седницата е усвоен и заклучок според кој Колегиумот на Собранието на РС треба да подготви нацрт-резолуција за самоопределување на српскиот народ и РС.
