Потпретседателот на САД, Џ. Д. Венс, во интервју за USA Today изјави дека е подготвен да ја преземе претседателската функција „ако, не дај Боже, се случи страшна трагедија“ со актуелниот претседател Доналд Трамп.
Сепак, тој нагласи дека е уверен дека Трамп ќе го одслужи целиот мандат и дека неговата здравствена состојба е одлична.
– Претседателот има неверојатна енергија. Тој е последниот што легнува, последниот што телефонира навечер и првиот што станува. Сигурен сум дека ќе направи големи работи за американскиот народ – рече Венс. „Ако, сепак, се случи трагедија, моето искуство во изминатите 200 дена е најдобрата подготовка“.
Изјавите на Венс доаѓаат во период на зголемена загриженост за здравјето на Трамп, поттикната од појавата на модрици на неговите раце и натечени глуждови. Лекарот на Белата куќа, д-р Шон Барбабела, објасни дека станува збор за хронична венска инсуфициенција – состојба која ја оцени како безопасна и честа за неговата возраст.
Според 25. амандман на Уставот на САД, потпретседателот ја презема претседателската должност доколку претседателот почине, поднесе оставка или биде разрешен. Во историјата, во девет наврати потпретседатели станале претседатели, меѓу кои Калвин Кулиџ во 1923 година по смртта на Ворен Хардинг.
Трамп неодамна го претстави Венс како свој најизгледен наследник и дел од движењето Make America Great Again (MAGA).
– Мислам дека најверојатно тој ќе биде – изјави Трамп, додавајќи дека и државниот секретар Марко Рубио би можел да има значајна улога во иднина.
