Рускиот претседател Владимир Путин разговараше со кинескиот претседател Си Џинпинг за најновите руско-американски контакти, соопшти денеска помошникот на рускиот претседател, Јуриј Ушаков, на маргините на самитот на Шангајската организација за соработка што се одржува во кинескиот град Тјенџин.
– Да, нашиот претседател, пред сè, многу детално комуницираше, секако, со претседателот на Народна Република Кина. Седеа заедно и можеа активно и многу ефикасно да разговараат. Вклучувајќи, како што ми кажа нашиот претседател, и за најновите контакти со Американците, рече Ушаков.
Претходно денеска, поздравувајќи ги учесниците на самитот, кинескиот претседател изрази уверување дека со заеднички напори на сите страни самитот ќе биде целосен успех и оти Шангајската организација за соработка сигурно ќе одигра уште поголема улога и ќе постигне поголем напредок.
Кинескиот претседател Си Џинпинг претходно се сретна и со премиерот на Ерменија, Никол Пашињан, и двајцата лидери најавија воспоставување стратешко партнерство.
Двете страни потпишаа заедничка изјава за воспоставување стратешко партнерство и неколку договори за соработка во областите на пазарен надзор, медиуми и други сектори.
Си Џинпинг истакна дека пријателството меѓу Кина и Ерменија има долга традиција и дека во текот на 33 години дипломатски односи е во постојан раст, се наведува во соопштението на кинеското Министерство за надворешни работи. Си нагласи дека воспоставувањето стратешко партнерство е значаен момент во историјата на билатералните односи и дека двете страни ќе работат на продлабочување на соработката во различни области.
