Џонатан Андик, син на Исак Андик, основачот на Манго, стана осомничен во истрагата за смртта на неговиот татко.
По смртта на Исак во планинска несреќа минатиот декември, неговите три деца со неговата поранешна сопруга Нојс Раиг Тараго, официјално го презедоа бизнис наследството на својот татко. Во последните години, според шпанските медиуми, бил во врска со каталонската стилистка Зенаида Буфил Комадран. Наследството ја вклучува семејната холдинг компанија Пунта На, која управува со недвижности, и акции во познатиот каталонски моден бренд. Основачот на Манго контролирал 95% од акциите на синџирот, додека преостанатите 5% му биле доделени на извршниот директор и сегашен претседател, Тони Руиз, како признание за неговата работа.Најголемиот поединечен акционер на Манго зад себе остави лично богатство проценето на 4,5 милијарди долари.
Кој е Џонатан?
Најстариот син, Џонатан Андик (44), ја презеде функцијата претседател на Манго МНГ Холдинг САУ, која го контролира уделот на семејството во модната компанија, и Пунта На Холдинг СА. Дипломирал аудиовизуелни комуникации во Соединетите Американски Држави, а го продолжил образованието на бизнис школата IESE, каде што се стекнал со специјализации по сметководство и финансии за директори и по менаџмент (EMBA).
Својата професионална кариера во компанијата ја започнал во 2005 година, кога се запознал со креативниот процес, дизајнот на колекциите и управувањето со тимови. Во 2007 година, го презел управувањето со новата линија Mango Man, со цел нејзино меѓународно лансирање. За време на неговата кариера во компанијата, тој исто така извршувал надзорни должности над одделот за комуникации и имиџ и бил задолжен за дизајн на ентериер и управување со градежништво во рамките на групацијата.
Сестри подалеку од очите на јавноста
Неговата најмлада сестра, Сара Андик (28), е потпретседател на Mango MNG Holding SAU, секретар на Punta Na Holding SA и е задолжена за недвижности. Најмладата ќерка е многу повлечена, но во еден момент била многу присутна во општествениот живот на Лондон, каде што студирала моден менаџмент и дизајн. Таа е единствената во семејството која работела за конкуренти, со пракси во Tous и Aristocrazy.
И најмистериозната од трите е средната сестра, Џудит Андик (41), исто така назначена за потпретседател на Mango MNG Holding SAU, а воедно и член и овластен претставник на Punta Na Holding SA и член на Punta Na SAU. Таа од самиот почеток одлучи да го следи патот на семејниот бизнис и студираше моден дизајн на Istituto Europeo di Design во Барселона. Работеше во одделите Premium и Committed на Mango, а од 2019 година се посвети на управување со имот во рамките на Punta Na.
Фотографиите од сестрите е невозможно да се најдат на социјалните мрежи и во агенциите.
Минатиот април, тројцата наследници ја завршија набавката на 1.000 м² простор од весникот La Vanguardia, бизнис започнат од нивниот татко.
По смртта на Исак Андик, одборот на директори на Mango беше реорганизиран. Џонатан Андик беше назначен за потпретседател на мултинационалната компанија на почетокот на годината, а минатиот месец се повлече од позицијата раководител на одделот „Манго Мен“, која ја држеше во последните 17 години, за да се фокусира на управувањето со семејниот имот.
Покрај Андик и Руиз, во одборот се вклучени клучни личности од компанијата како што се Даниел Лопез и Маргарита Салванс како извршни директори, и пет независни директори: професорот на IESE, Жорди Каналс, основачот на AZ Capital, Хорхе Лукаја, поранешниот извршен директор на „Данон“ и „Луј Витон“, Жорди Констанс, и претседателот и поранешен извршен директор на „Дезигуал“, Манел Адел.
Семејство Андик: Неговата невиност ќе биде докажана
Семејството Андик издаде соопштение за медиумите: „Семејството Андик не коментираше и нема да коментира за смртта на Исак Андик во текот на сите овие месеци. Сепак, тие сакаат да покажат почит кон тековните истраги и ќе продолжат да соработуваат со надлежните органи, како што правеа досега. Тие се исто така уверени дека овој процес ќе биде завршен што е можно поскоро и дека невиноста на Џонатан Андик ќе биде докажана.“
Клисурата Монсерат каде што падна во смрт Исак Андик
Портпаролот на полицијата изјави дека не може да коментира за случајот бидејќи истрагата е во тек, додека портпаролот на каталонските судови потврди дека постапката е доверлива.
Кој беше Исак Андик?
Андик, роден во сефардско еврејско семејство во Истанбул во 1953 година, емигрирал во Каталонија кон крајот на 1960-тите. Тој започнал продавајќи маици на соученици, потоа водел бизнис на големо и продавал облека на уличните пазари пред да ја отвори својата прва продавница „Манго“ во 1984 година.
„Тој видел дека ни треба боја, стил“, рече Сезар де Висенте, глобален раководител на малопродажбата во „Манго“, во март минатата година. Андиќ наскоро отворил десетици нови продавници низ Европа и „сфатил дека имањето исто име, ист бренд во сите продавници, ќе го направи концептот многу посилен“, додаде де Висенте.
