Портпаролката на руското Министерство за надворешни работи, Марија Захарова, изјави дека Москва постојано добивала гаранции од српското раководство дека извозот на муниција е под строга контрола и дека оружје од српско производство нема да биде испорачано во Украина.
„Москва постојано добива гаранции од српското раководство дека извозот на муниција од српско производство е под строга контрола и дека нема да биде испорачана во Украина, со цел да се спречи Киев да ја употреби против нашите војници“, рече Захарова на редовниот брифинг, коментирајќи ги изјавите на претседателот Александар Вучиќ во интервју за германско списание за подготвеноста на Србија да продава муниција на Европската Унија.
Зборувајќи за контрадикторните јавни изјави на српскиот претседател, Захарова додаде:
„Знаете, кога ги читам сите овие интервјуа на српскиот претседател, се прашувам – дали навистина има само еден претседател Вучиќ таму, бидејќи се добива впечаток дека овие интервјуа ги даваат сосема различни луѓе. Некои изјави ги слушаме кога е во Москва, а сосема различни кога зборува од други географски точки. Зборувам само за она што е во јавната сфера. Можеби медиумите погрешно известија за нешто, но во тој случај треба да има објаснување од прес-службата на претседателот“, истакна Захарова, пренесоа руските државни агенции.
Таа потсети дека руската страна постојано слушала уверувања од Белград на највисоко ниво за почитување на неутралноста и контрола на извозот на оружје:
„Да бидам искрена, неколку пати, и на највисоко ниво, добивме изјави од српското раководство дека извозот на српска муниција е строго контролиран и дека оваа стока нема да заврши во Украина, со цел да се спречи да се користи против нашите војници“, нагласи портпаролката на руското Министерство за надворешни работи.
