Се бара решение за иднината на 550-те вработени во подружницата на „Лукоил“ во Македонија, откако матичната руска компанија одлучи да го продаде имотот во странство поради американските санкции за нафта.
Претседателот на Регулаторната комисија за енергетика (РКЕ), Марко Бислимоски, денеска изјави дека локалната компанија може да продолжи со работа доколку се преориентира.
Според него, „Лукоил Македонија“ не мора да се снабдува со деривати од руски рафинерии.
„Имав средба со претставникот на Лукоил Македонија и тој ќе ги преземе сите мерки за тие луѓе да не останат без работа. Значи, Лукиол може и понатаму да работи и да обезбедува нафтени деривати. Досега, најголем дел обезбедувал од Бугарија, но може да обезбедува и од други земји така што во тој дел треба да му дадеме шанса и понатаму да работи, не мора да се снабдува со деривати обезбедени од руски рафинерии“, рече Бислимоски.
Компанијата во моментов управува со 40 бензински пумпи и 10 резервоари во државата.
