По серија одложувања на извршувањето на казната, правдани со медицински причини, сопственикот на превозникот „Дурмо турс“, Дурмиш Белули, конечно се пријави во затворот „Идризово“.
Веста ја потврди директорот на казнено-поправната установа, Зоран Јовановски, кој изјави дека Белули е примен и сместен според стандардната процедура за да ја одлежи 10-годишната затворска казна за страотната несреќа кај Ласкарци во која загинаа 16 луѓе.
Белули вешто го одложуваше одењето во затвор. Во октомври се повика на операција од кила, а на 1 декември доби уште едно одложување поради операција на тестис. Судијата за извршување санкции тогаш мораше лично да контактира со хирургот во тетовската болница за да ја провери веродостојноста на медицинските наоди. Сепак, правните можности за одложување се исцрпени и тој сега е зад решетки.
