Во главниот град на Данска, Копенхаген, денеска се одржа протест каде имаше илјадници луѓе против плановите на американскиот претседател Доналд Трамп да ја преземе контролата врз Гренланд, што е данска автономна територија.
Демонстрантите, кои се собраа на градскиот плоштад во Копенхаген пред да се упатат кон амбасадата на САД, скандираа „Гренланд не е на продажба“, некои држеа транспаренти со слогани како „Рацете подалеку од Гренланд“ и црвено-белото знаме на Гренланд. На Гренланд живеат околу 57.000 луѓе.
„Демонстрираме против американските изјави и амбиции за анексија на Гренланд. Бараме почитување на правото на самоопределување на Данска и Гренланд. Се надеваме дека можеме да покажеме дека има многумина од нас кои го поддржуваат Гренланд“, објави Здружението на Инуити.
За попладнево се закажаи протести и во Нук, главниот град на Гренланд.
Специјалниот пратеник на Трамп за Гренланд, Џеф Ландри, изјави вчера дека „треба да се постигне“ и „ќе се постигне“ договор за „преземање“ на големиот арктички остров од страна на САД и дека Трамп „сериозно размислува“ за автономната територија што е дел од Данска.
