Претседателот на Соединетите Американски Држави, Доналд Трамп го предупреди Техеран дека „времето истекува“ за преговори за договор за нуклеарната програма на Иран.
Американските поморски сили, кои се распоредени во регионот, „брзо се движат, со голема сила, ентузијазам и цел“ кон Иран, рече тој.
Техеран е „подготвен за дијалог заснован на меѓусебно почитување и интереси“, но доколку биде принуден, ќе се брани и ќе „одговори како никогаш досега“, соопшти мисијата на Иран во Обединетите нации (ОН).
Иран инсистира дека неговата нуклеарна програма е целосно мирна и постојано негира дека се обидува да развие нуклеарно оружје.
Последното предупредување на Трамп до лидерите на Иран следеше по сугестиите дека Вашингтон би можел да интервенира за да им помогне на оние кои се вклучени во бруталното задушување на демонстрациите во земјата претходно овој месец.
„Помошта е на пат“, им рече тој на демонстрантите претходно овој месец.
Потоа го промени својот став бидејќи му беше кажано „од сигурен извор“ дека егзекуцијата на демонстрантите престанала.
Американската новинска агенција (HRANA) на Human Rights Watch соопшти дека потврдила убиство на повеќе од 6.000 луѓе, вклучувајќи 5.858 демонстранти, откако започнаа немирите кон крајот на декември.
Според нив се истражуваат уште 17.000 пријавени смртни случаи.
Бројот на жртви би можел да надмине 25.000, објави организацијата „Iran Human Rights“ (IHR) со седиште во Норвешка.
Сепак, последното предупредување на Трамп се чини дека е за нуклеарната програма на Иран.
„Се надеваме дека Иран брзо ќе „седне на преговарачка маса“ и ќе преговара за фер и правичен договор – БЕЗ НУКЛЕАРНО ОРУЖЈЕ“, напиша тој онлајн на Truth Social.
Поморските сили во Заливот се побројни од оние испратени во Венецуела, рече Трамп.
Овие сили се „подготвени, спремни и способни брзо да ја извршат мисијата и со насилство доколку е потребно“, додаде тој.
Зборувајќи за американските напади врз клучните ирански нуклеарни објекти минатиот јуни, Трамп предупреди: „Следниот напад ќе биде многу полош! Не дозволувајте да се случи повторно.“
„Дипломатијата преку воени закани не може да биде ефикасна, ниту корисна“, рече Абас Арагчи, министерот за надворешни работи на Иран.
„Ако тие (Америка) сакаат преговорите да добијат некаква форма, сигурно мора да ги остават настрана заканите, прекумерните барања и нелогичните прашања“, рече тој во телевизиско обраќање, пренесено од новинската агенција Франс Прес.
Користејќи алатки со отворен код, Би-би-си Верифи успеа да ги следи дел од распоредувањата на американските сили.
Службеник на Министерството за одбрана на САД потврди за Би-би-си Верифи дека на Блискиот Исток пристигнала и поморска „армада“, предводена од американскиот брод „Абрахам Линколн“.
Америка претходно презеде мерки против нуклеарните објекти на Иран.
Во јуни 2025 година, целта беа три постројки за збогатување ураниум во Иран: Фордо, Натанц и Исфахан.
Американските претставници во тоа време изјавија дека операцијата „Полноќен чекан“ значително ги намалила шансите на Техеран за изградба на нуклеарно оружје.
Иран „не претрпе голем удар бидејќи материјалите веќе беа изнесени“ од трите постројки, рече Хасан Абедини, заменик-директор на иранската државна телевизија.
Како одговор на американските напади, Иран лансираше ракети врз американската воена база во Катар – напад што Трамп го опиша како „многу слаб“ и „очекуван“.
