Џим Кери доби овации од високите претставници на француската филмска индустрија на 51-то доделување на наградите „Цезар“, каде што ја прифати почесната награда и одржа емотивен говор целосно на француски јазик. Ѕвездата на „Маската“ и „Како Гринч го украде Божиќ“ ја освои наградата, која традиционално се доделува на меѓународни филмски ѕвезди, а минатата година ѝ припадна на Џулија Робертс.
На сцената го покани режисерот Мишел Гондри, со кого го сними „Вечното сонце на беспрекорниот ум“ пред 22 години. Кери им се обрати на публиката на француски јазик, со забележлив американски акцент.
„Како актер, секој лик што го играте е како глина во рацете на скулптор, го обликувате според желбата на вашето срце. Каков благослов беше да ја споделам оваа уметност со толку многу луѓе кои навистина ми ги отворија срцата“, рече тој.
Тој, исто така, откри дека неговиот предок Марк-Франсоа Каре е роден во Франција пред околу 300 години. „Вечерва, со оваа величествена чест, тој „carré“, што на француски значи квадрат, симболично се заокружи“, рече актерот, кој на церемонијата на доделување награди пристигна во придружба на неговата ќерка Џејн, внукот Џексон и партнерката Мина.
Тој, исто така, му се заблагодари на своето семејство за нивната поддршка. „Благодарам на моето прекрасно семејство, ќерка Џејн и внукот Џексон. Ве сакам сега и засекогаш. Благодарам на мојата возвишена партнерка Мина. Те сакам, Мина“, рече тој, пред да се сети на својот татко.
„И конечно, благодарам на најсмешниот човек што некогаш сум го запознал, мојот татко Перси Џозеф Кери, кој ме научи на вредноста на љубовта, великодушноста и смеата“, додаде тој.
Тој го заврши својот говор со шега за неговото познавање на јазикот. „Па, како беше мојот француски? Речиси просечен, нели? Извинете, не зборував француски, сè уште го учам. Мојот јазик е уморен“, рече тој, предизвикувајќи насмевки и аплауз од публиката.
