Европските лидери мора итно да дејствуваат за да го зачуваат она што останало од клучните столбови на трансатлантското партнерство, првенствено од Организацијата на северноатлантскиот договор, предупреди финскиот претседател, Александар Стуб, во изјава за британскиот „Телеграф“.
Тој оцени дека Европа се соочува со нови политички околности поради идеолошкиот и политички курс што го заговара американскиот претседател, Доналд Трамп, и дека е потребно да се преземат итни и промислени чекори за зачувување на стабилноста на Алијансата, која со децении е столб на западната безбедност.
Според Стаб, откако ќе бидат заштитени најважните институции во трансатлантските односи, европските земји ќе мора да водат внимателно балансирана, но во исто време и решителна политика кон Вашингтон. Таквиот пристап, нагласи тој, подразбира способност за соработка таму каде што има заеднички интерес, но и јасно да се постават граници за прашањата каде што се разликува мислењето.
Во овој контекст, финскиот претседател изјави дека земјите од Европската Унија треба учтиво, но решително да отфрлат одредени иницијативи на американската администрација, особено во областите на трговската политика и климатската агенда.
Стуб претходно тврдеше дека Соединетите Американски Држави се промениле од своите денови како „бениген хегемон“ во непредвидлива, но, сепак, исклучително моќна сила. Затоа, заклучува тој, Европа мора да покаже поголема независност и политичка зрелост во заштитата на сопствените интереси, без да ги загрози стратешките партнерства што се од витално значење за нејзината безбедност.
