По изборната победа на Петер Маѓар, во јавноста повторно се актуелизира неговиот приватен живот, особено разводот со поранешната министерка за правда Јудит Варга, со која има три деца.
Двајцата биле во брак од 2006 до 2023 година, а нивниот развод првично поминал без големо медиумско внимание. Сепак, приказната повторно изби во јавноста во 2024 година, кога Маѓар започна политички подем и јавно проговори за односите во власта, но и за својот приватен живот.
Во меѓувреме, Варга поднесе оставка од министерската функција поради контроверзниот случај со помилување, кога лице поврзано со прикривање на сериозно кривично дело доби претседателско помилување со нејзин потпис. Скандалот сериозно го наруши угледот на тогашната власт.
Кулминацијата на конфликтот меѓу поранешните сопружници дојде кога Маѓар објави аудио-снимки за кои тврдеше дека откриваат обиди за влијание врз правосудството. Тоа предизвика силни политички реакции и дополнително ја разгоре јавната дебата.
Набргу потоа, Варга излезе со сериозни обвинувања против Маѓар, тврдејќи дека за време на бракот била изложена на психичко и емоционално насилство. Таа во интервјуа наведе дека била заклучувана против своја волја, оттурната додека била бремена, како и дека тој се движел низ домот со нож во рака. Според неа, имало и инцидент во кој лажно прикажал обид за самоубиство.
Маѓар ги отфрли сите обвинувања, нарекувајќи ги клевета и политички мотивирани напади, тврдејќи дека доаѓаат под притисок на поранешната власт и провладини медиуми.Според полициски извештаи објавени во медиумите, за време на еден инцидент тој наводно се однесувал агресивно и заканувачки, додека Варга, со полициска заштита, се обидувала да ги одведе децата. Маѓар, пак, тврди дека тие документи се фалсификувани.
И покрај жестоките обвинувања и јавниот конфликт, Маѓар по победата на изборите изјави дека не сака дополнително да ја коментира ситуацијата.
– „Ниту сега, ниту во иднина нема да одговарам на овие повторувани обвинувања. И посакувам на поранешната сопруга мирен живот“, изјави новиот унгарски лидер.Случајот останува чувствителна тема во унгарската јавност, особено во контекст на неговиот брз политички подем и промените што ги најавува во земјата.
