Два воза директно се судриле на железнички премин северозападно од Копенхаген, при што четворица се критично повредени, а уште 13 луѓе завршиле во болница, објави „Би-би-си“.
Возовите сообраќале на линија што ги поврзува градовите Хилерод и Кагеруп во регионот Северен Зеланд во североисточна Данска.
Противпожарната служба не може да каже што ја предизвикало несреќата, но изјави за данската телевизија дека сите повредени биле пренесени во болница со хеликоптер или со амбулантни возила.
Локалната градоначалничка Трине Егетвед изјави дека е длабоко потресена од несреќата.
Јавниот сервис на Данска објави снимки на два воза во жолто-сива боја, со видливи оштетувања на предниот дел, кои се наоѓале еден спроти друг во шумска област.
Противпожарната и спасувачка служба во Фредериксборг соопшти дека била известена за несреќата околу 06:30 часот по локално време.
Егетвед, која е градоначалничка на општината Грибсков, рече дека луѓето со тешки повреди биле пренесени во Националната болница во Копенхаген.
„Локалната пруга ја користат многу жители, работници и студенти од Грибсков“, напиша таа на „Фејсбук“.
Железничките несреќи се ретки во Данска, а еден експерт претпостави дека еден од машиновозачите можеби завршил на погрешна линија откако поминал сигнал за стоп при напуштање на локална станица. Се смета дека пругата Грибсков нема воведен автоматизиран безбедносен систем.
