Европската Унија денеска официјално го означи почетокот на новата ера во секторот за недвижности и туризам со стапувањето на сила на долгонајавуваната Регулатива (ЕУ) 2024/1028.
Овие нови и ригорозни правила имаат за цел конечно да воведат ред, транспарентност и законска контрола врз дигиталните платформи за краткорочен престој како што се Airbnb и Booking. Со овој чекор, Брисел директно одговара на повеќегодишните поплаки од големите европски метрополи кои се соочуваат со сериозна станбена криза и драстичен скок на цените на кириите поради масовното и неконтролирано претворање на становите во туристички апартмани.
Задолжителни дигитални регистарски броеви за секој оглас
Суштината на новата регулатива лежи во воведувањето на единствени системи за дигитална регистрација на ниво на секоја земја членка. Од денес, секој изнајмувач кој сака да го понуди својот стан или куќа на пазарот ќе мора да поседува официјален регистрациски број издаден од локалните власти.
Booking и Airbnb имаат и обврска за редовно и автоматизирано доставување детални извештаи до надлежните државни органи. Платформите ќе мора на месечно ниво да ги споделуваат сите клучни информации за активностите на домаќините, вклучувајќи го точниот број на остварени ноќевања, бројот на примени гости, локацијата на објектот и идентитетот на сопственикот. Овие податоци ќе се слеваат преку единствена дигитална пристапна точка, овозможувајќи им на даночните инспекции во секунда да видат кој заработува од туризам, а не плаќа давачки.
Важно е да се напомене дека оваа регулатива е наменета исклучиво за приватниот и краткорочниот наем на станови во станбени згради и куќи, додека традиционалните хотели, хостели и автокампови се изземени бидејќи тие веќе подлежат под други строги закони за категоризација.
За патувачите и туристите, пак, ова ќе значи многу поголема сигурност и драстично помал ризик од лажни огласи и измами со сместувањето.
