Министерството за здравство продолжува со реализација на капитални проекти што треба значително да ја унапредат здравствената инфраструктура во земјата. Плановите и тековните активности беа презентирани на 10-тиот состанок на секторската работна група за здравство, пренесе МИА.
Министерот за здравство, Азир Алиу, истакна дека целта е создавање достапен, модерен и ефикасен здравствен систем за сите граѓани.
-Нашата визија е јасна – квалитетно здравство достапно за секој граѓанин, дигитално поврзан систем и силна примарна здравствена заштита. Инвестициите во инфраструктурата не значат само изградба на објекти, туку вложување во луѓето, здравствениот систем и иднината на државата – изјави Алиу.
Меѓу најзначајните проекти се изградбата на нова Клиничка болница во Штип, нова Општа болница во Кичево и Клиничка болница во Тетово. Предвидена е и изградба на Центар за рани и гангрени во рамки на Специјализираната болница за геријатриска и палијативна медицина „13 Ноември“ во Скопје, додека во следната фаза е планиран и нов Клинички центар.
Покрај инфраструктурните инвестиции, се работи и на проекти од социјален и хуман карактер, меѓу кои подобрување на условите за судски пациенти во Психијатриската болница во Скопје и воспоставување Иновативен хаб во Кочани.
Во тек е и реализација на повеќе стратешки здравствени проекти, вклучувајќи Ургентен центар за токсикологија, развој на ин витро капацитетите во гинекологијата и зајакнување на интензивната нега во кардиологијата.
Според министерот, модернизацијата на здравството подразбира и забрзана дигитализација на системот преку национални дигитални платформи, лабораториски мрежи и интегрирани услуги кои ќе овозможат побрз и полесен пристап до здравствена заштита за граѓаните во сите делови на државата.
