Министерот за спорт, Борко Ристовски денес присуствуваше на пуштањето во употреба на новата спортска сала во населбата Расадник, Општина Кисела Вода.
Ристовски изрази задоволство од тоа што спортистите и рекреативците добиваат уште еден објект кој ќе можат да го користат за подготовка и натпревари.
– Од она што некогаш беше руина, направивме сосема солиден спортски храм којшто има пропратни дејствија. Пред салата се наоѓа преубав плоштад на кој покрај спортски активности ќе може да го запазиме и социјалниот моментум. Ова е само еден пример како може да се истурка целиот процес, од одземање на ингеренциите на човекот кој ја раководеше салата 30 години до правење проект, до изнаоѓање средства благодарение на претседателот на Владата, па се до комплетна реализација. Покажавме со дела дека навистина дека работите можат да биде поинакви и ние како Министерство и како Влада генерално сакаме делата да говорат за нас. Македонија доби уште еден репрезентативен објект. Верувам дека од овој спортски храм ќе изникнат многу спортисти кои успешно ќе ја претставуваат Македонија, рече Ристовски.
