Вчерашното силно невреме предизвика сериозни оштетувања на средниот и нискиот напон на електродистрибутивната мрежа низ повеќе градови во државата.
Поради оштетувања и неколку стотици паднати столбови, без напон останаа вкупно 2.308 трафостаници на Електродистрибуција.
Според соопштението на компанијата, најпогодени беа делови од Скопје, Куманово, Кочани, Штип, Струмица и повеќе други населени места.
Засилени екипи работеа без престан во тешки услови на терен и успеаја да санираат дури 90 проценти од дефектите.
Од Електродистрибуција информираат за моменталната состојба на теренот:
„Во моментов, на територијата на целата држава, 300 трафостаници се сè уште без напојување, бидејќи паднатата вегетација на многу места целосно го блокира пристапот на нашите екипи и дополнително ја отежнува работата. И покрај тоа, интервенциите на терен нема да запрат сѐ до целосно надминување на настанатата ситуација.“
Од компанијата упатија апел и благодарност до граѓаните за разбирањето за време на санирањето на штетите.
Во нивното соопштение се додава:
„Изразуваме благодарност до корисниците за покажаното трпение и разбирање во овие вонредни околности. Санацијата на секој поединечен дефект е резултат на максималниот ангажман на нашите екипи на терен. Сите капацитети и ресурси на компанијата се ставени на располагање до целосно нормализирање на снабдувањето со електрична енергија до сите корисници.“
