Бројот на кражби на автомобили во Германија е „драстично зголемен“, со повеќе од 40 возила украдени секој ден, соопшти Федералната канцеларија за криминал (БКА).
Минатата година биле украдени 15.924 возила, што е за девет отсто зголемување во однос на претходната година, а сличен тренд продолжи и годинава, пишува Дојче веле.
Кражбите најмногу се случуваат во големите градови како Берлин и Хамбург, а особено се погодени камионите, како и земјоделските и градежните возила, чии кражби се зголемени за повеќе од 48 проценти.
Модерните автомобили со безжично отклучување и системи за палење, кои им овозможуваат на возачите да го стартуваат возилото без да го извадат клучот од џебот, станаа мета на сè пософистицирани крадци.
Според извештаите, крадците користат уреди како засилувачи на радио сигнал кои им овозможуваат да го „подигнат“ сигналот од клучот дури и кога е во домот на сопственикот, а потоа да го пренесат на возилото, овозможувајќи кражба за само неколку минути.
Земјоделските и градежните возила често немаат соодветен систем за заштита, па се повеќе се мета на крадците.
Крадците користат онлајн платформи за купување и продавање на украдени возила, кои обично потоа ги транспортираат во Источна Европа или ги расклопуваат.
Германската полиција нагласи дека бандите се организирани и меѓународно поврзани, а истрагата за кражби на автомобили станува сè посложена поради професионалноста на криминалците.
Иако е можно да се постават механички бариери или GPS системи за следење, експертите предупредуваат дека нема целосна безбедност.
Осигурувањето на возилата станува клучна заштита, но високата стапка на кражба ги зголемува цените на осигурувањето.
