Вработените во Фолксваген почнаа со предупредувачки штрајкови низ Германија, по неуспехот на разговорите за намалување на трошоците меѓу синдикатите и раководството. Доколку разговорите не дадат резултати, синдикатот предупредува дека би можела да следи најтешката битка во историјата на колективното договарање на компанијата.
Торстен Грегер, главен преговарач на синдикатот ИГ Метал, истакна дека корпоративната структура на Фолксваген им овозможува на работниците значително влијание врз одлучувањето, што го прави поголем предизвик за раководството самостојно да спроведе намалување на трошоците и драстични мерки.
Претставниците на вработените имаат половина од местата во надзорните одбори на компанијата, додека покраината Долна Саксонија, која е мнозински акционер, има уште две места во тие одбори
Фолксваген се соочува со проблеми поради намалената побарувачка за електрични возила, повисоките оперативни трошоци и зголемената конкуренција од кинеските производители. Планот на менаџментот е да затвори три фабрики во Германија и да отпушти илјадници работници за да ги намали трошоците. Сепак, синдикатите се противат на овој план и се залагаат за алтернативи кои би ги зачувале работните места и правата на вработените.
Поради неизвесноста предизвикана од преговорите, акциите на Фолксваген денеска паднаа за 1,9 отсто.
